Kuri uyu wa Gatatu, tariki ya 15 Mata 2026, ku Rwibutso rwa Jenoside rwa Cour d’Appel de Ruhengeri ruherereye mu Karere ka Musanze, habereye igikorwa cyo Kwibuka ku nshuro ya 32 Jenoside yakorewe Abatutsi. Hibutswe by’umwihariko Abatutsi biciwe mu nyubako zahoze ari Urukiko rw’Ubujurire rwa Ruhengeri, ahasigaye ari ikimenyetso ndasimburwa cy’amateka mabi ya Jenoside, kigaragaza uburyo yakoranywe ubugome bukabije n’urugero rw’aho yageze.

Iki gikorwa cyitabiriwe n’abayobozi batandukanye, barimo Minisitiri Marizamunda Juvénal wari Umushyitsi Mukuru, Guverineri w’Intara y’Amajyaruguru, Mugabowagahunde Maurice, Perezida w’Urukiko rw’Ubujurire, Rukundakuvuga François Régis, Abadepite n’Abasenateri, inzego z’umutekano, abayobozi b’Uturere twa Burera, Gakenke na Gicumbi, abahagarariye amadini n’amatorero, abarokotse Jenoside ndetse n’abaturage baturutse hirya no hino.

Mu kiganiro yatanze, Guverineri w’Intara y’Amajyaruguru, Mugabowagahunde Maurice, yagaragaje ko kwicirwa kw’Abatutsi muri Cour d’Appel, ahari Ingoro y’Ubutabera, ari ikimenyetso gikomeye cy’ugutsindwa kw’ubutabera bwariho icyo gihe. Yavuze ko ari ibintu bidasanzwe kubona Jenoside ikorerwa ahantu hagenewe kurengera abaturage no kubaha ubutabera, bikaba ari isomo rikomeye rikwiye guhora ryibukwa.

Umuhoza Brigitte, umwe mu barokokeye muri izi nyubako, yagarutse ku mateka mabi banyuzemo, agaragaza ko bajyanywe aho bizeye kurokoka, ariko bagatereranwa n’abari bafite inshingano zo kubarinda. Yavuze ko benshi bahasize ubuzima, anashimira Inkotanyi zamurokoye mu gihe ubuzima bwe bwari buri mu kaga gakomeye, bikamuha kongera kubona icyizere cyo kubaho.

Mu butumwa bwe, Minisitiri Marizamunda Juvénal, yashimangiye ko u Rwanda rudashobora guhunga amateka yarwo, ahubwo ko agomba gukomeza kwifashishwa nk’isomo ryo guhangana n’abahakana n’abapfobya Jenoside yakorewe Abatutsi, ndetse n’abakwirakwiza ingengabitekerezo yayo.