Abashinzwe ubuhinzi mu Ntara y’Amajyaruguru basabwe kurushaho kwegera abahinzi no kubafasha kongera umusaruro

Abashinzwe ubuhinzi mu Ntara y’Amajyaruguru basabwe kurushaho kwegera abahinzi, kubongerera ubumenyi n’ubushobozi no kubafasha kubona inyongeramusaruro ku gihe, mu rwego rwo kongera umusaruro no guteza imbere ubuhinzi burambye.

Ibi byagarutsweho kuri uyu wa gatanu, tariki ya 21 Kanama 2026, mu nama nyunguranabitekerezo ku buhinzi ku rwego rw’Intara y’Amajyaruguru, yabereye i Musanze ikaba yibanze ku myiteguro y’Igihembwe cy’Ihinga 2027 A.

Iyi nama yayobowe na Guverineri w’Intara y’Amajyaruguru, Mugabowagahunde Maurice, yitabiriwe n’Umuyobozi Mukuru w’Agateganyo w’Ikigo cy’Igihugu gishinzwe Ubuhinzi n’Ubworozi (RAB), Dr. Florence Uwamahoro, abagize Inama y’Umutekano itaguye y’Intara, Abayobozi b’Uturere n’Abayobozi b’Uturere Bungirije bashinzwe Iterambere ry’Ubukungu, abahagarariye Umufatanyabikorwa One Acre Fund (Tubura), abakozi bashinzwe ubuhinzi n’ubworozi mu Turere ndetse n’abahagarariye amakoperative y’abahinzi.

Guverineri Mugabowagahunde yasabye abashinzwe ubuhinzi mu Turere no mu Mirenge, ndetse n’abafatanyabikorwa mu rwego rw’ubuhinzi, kurushaho kwegera abahinzi no kubafasha kubona ubumenyi n’ubushobozi bubafasha kuvugurura no guteza imbere imikorere y’ubuhinzi.

Yabasabye kandi gukurikirana by’umwihariko ko abahinzi babona imbuto nziza n’ifumbire ku gihe, kugira ngo umusaruro wiyongere kandi Intara y’Amajyaruguru ikomeze gutera imbere mu kwihaza mu biribwa.

Ku ruhande rwe, Umuyobozi Mukuru w’Agateganyo wa RAB yashimangiye ko kongera umusaruro w’ubuhinzi bisaba gukoresha neza ubutaka bwose bugomba guhingwa, kongera umusaruro ukomoka kuri Site za FOBASI, gukoresha ifumbire y’imborera ihagije no guteza imbere ubuhinzi bubungabunga ubutaka.

Yagaragaje kandi ko izi ngamba zigomba kujyana no gukoresha neza ikoranabuhanga n’ubumenyi bugezweho mu buhinzi, kugira ngo umusaruro wiyongere kandi ubuhinzi bukomeze gutezwa imbere.

Ibiganiro byatanzwe muri iyi nama, byibanze ku myiteguro y’Igihembwe cy’Ihinga 2027 A, guteza imbere ibihingwa byoherezwa mu mahanga, kongera umusaruro no gukomeza kunoza imikorere mu rwego rw’ubuhinzi.

Hanaganiriwe kandi ku ruhare rw’abafatanyabikorwa, by’umwihariko One Acre Fund (Tubura), mu guteza imbere ubuhinzi no gufasha abahinzi kubona ubumenyi, inyongeramusaruro n’izindi serivisi zibafasha kongera umusaruro.

Abitabiriye inama bunguranye ibitekerezo ku ngamba zafasha gukemura imbogamizi zikigaragara mu buhinzi, guteza imbere umusaruro w’abahinzi no gukoresha neza amahirwe ahari mu rwego rw’ubuhinzi.

Inama yagaragaje ko hakenewe ubufatanye n’ubukangurambaga bihoraho, cyane cyane mu kwegera abahinzi, kubongerera ubumenyi no kubafasha kubona inyongeramusaruro ku gihe, kugira ngo imyiteguro y’Igihembwe cy’Ihinga 2027 A izagere ku ntego yo kongera umusaruro, guteza imbere ubuhinzi no gukomeza uruhare rw’Intara y’Amajyaruguru mu kwihaza mu biribwa.